‘Serbia nuk e njohu Kosovën’

Serbia nuk ka ndërmarrë asnjë hap në drejtim të njohjes së pavarësisë së Kosovës, ndërsa të gjitha vendimet e marra në Bruksel e mbështesin këtë qëndrim, ka deklaruar shefi i delegacionit serb, Borko Stefanovic.

“Kemi gjetur zgjidhje për problemet praktike në Kosovë, pikë së pari për serbët në jug të lumit Ibër, të cilat do të ndihmojnë që ata të jetojnë jetë normale dhe të sigurt”, ka thënë Stefanovic. Ai ka thënë se marrëveshjet në asnjë mënyrë nuk vënë në pikëpyetje qëndrimin e Serbisë karshi pavarësisë së Kosovës.

Kreu i opozitës serbe, ish-kryeministri i Serbisë, Vojislav Kostunica, ka deklaruar një ditë më parë se me marrëveshjet e arritura ndërmjet Beogradit e Prishtinës, qeveria e Serbisë nuk e ka respektuar besimin e të gjitha shteteve që e kundërshtojnë pavarësinë e Kosovës dhe u ka dhënë goditje historike të rëndë dhe serioze interesave të Serbisë.

Edhe opozita kosovare nga ana e saj i ka cilësuar të padobishme për Kosovën marrëveshjet e arritura në Bruksel ndërmjet Prishtinës dhe Beogradit. Opozita vlerëson se nuk bëhet fjalë për marrëveshje ndërshtetërore, por për konkluzione me të cilat palët janë pajtuar në formë gojore pa përcaktuar afate kohore dhe modalitete të zbatimit të tyre.

Fakti se marrëveshjet janë të panënshkruara, nuk përmbajnë afate dhe nuk përmendet ratifikimi i tyre në Parlament, sipas opozitës, dëshmon se ato nuk i përmbushin karakteret e marrëveshjeve ndër-shtetërore. /Telegrafi/