Samardzic: Serbia e njohu Kosovën

Zëvendëskryetari i Partisë Demokratike Serbe (PDS), Slobodan Samardzic ka thënë se qeveria e Serbisë nuk duhet edhe më tutje të përpiqet që të bind qytetarët se si nuk e ka njohur Kosovën e pavarur, sepse me bisedimet e nisura të delegacioneve serbe dhe atij të Prishtinës, kjo gjë definitivisht është bërë.
“Përfaqësuesi kryesor i Serbisë në këto bisedime, e ka vizituar Prishtinën në cilësinë e përfaqësuesit zyrtar të shtetit të Serbisë në shtetin e Kosovës. Kjo konfirmohet kur është ulur në tryezë me flamurin e shqiptarëve të Kosovës dhe flamurin e Serbisë”, ka thënë ai për agjencinë Beta.

Samardzic e ka vlerësuar shkuarjen e delegacionit serb në Prishtinë për vazhdimin e dialogut që është nisur me 8 mars në Bruksel si “edhe një formë e njohjes së Kosovës si shtet i pavarur”.

“Siç ka thënë edhe përfaqësuesi amerikan në këto bisedime, Thomas Countryman, këto janë bisedime në mes të përfaqësuesve të dy shteteve. Përfaqësuesit tanë vazhdojnë të thonë se kjo nuk është kështu dhe se fjala është për çështje teknike”, ka thënë Samardzic, i cili ka qenë negociatori kryesor i Serbisë gjatë bisedimeve në Vjenë për statusin e Kosovës me ndërmjetësin e ish-presidentit finlandez Martti Ahtisaari.

Sipas tij, ky proces gjendet në “rrugë të gabuar dhe pa kthim” dhe se e tëra filloi vitin e kaluar, me miratimin e rezolutës në Asamblenë e Përgjithshme të OKB-së për fillimin e bisedimeve në mes të Prishtinës dhe Beogradit rreth çështjeve që kanë rëndësi për jetën e qytetarëve të Kosovës. /Telegrafi/