Merkel: Serbia t’i zgjidh mosmarrëveshjet me Kosovën

Kancelarja gjermane Angela Merkel, është takuar sot në Beograd
me presidentin e Serbisë, Boris Tadic, për të kërkuar nga ai që t’i
zgjidhë mosmarrëveshjet mes Serbisë dhe Kosovës.Merkel ka thënë se një nga parakushtet për Serbinë që të integrohet në BE është normalizimi i marrëdhënieve me Kosovën.
Vizita e kancelares Merkel vjen pak ditë përpara rifillimit të
bisedimeve të ndërmjetësuara nga BE-ja në mes të Prishtinës dhe
Beogradit, në Bruksel, me 2 shtator.

E pyetur për paralajmërimet e Prishtinës se para fillimit të dialogut
me Beogradin mund të ndërmarrë masa në veri të Kosovës, ajo tha se
“Gjermania kërkon që dialogu të vazhdojë, që rezultatet të vijnë nga
këto bisedime”.

“Kështu do të zvogëlohet rreziku ndaj masave të njëanshme”, ka thënë Merkel, transmeton “Tanjug”.

Merkel ka insistuar të shënohet përparim në raportet mes Prishtinës dhe Beogradit.

"E di se problemet nuk mund të zgjidhen brenda natës, por besoj se problemet, si me tregtinë, është e mundur të zgjidhen”.

Në lidhje me vizitën e kancelares Merkel në Beograd, analisti gjerman
pranë Këshillit për Demokratizim Politik, Bodo Weber, ka deklaruar se
kancelarja në Beograd nuk do të theksojë njohjen e Kosovës si kusht për
hyrjen e Serbisë në BE, “edhe pse të gjithë e dijmë se ky është de facto
një kusht”.

“Mirëpo, ajo do të heq dorë nga caktimi i datës për hapjen e
negociatave për anëtarësim të Serbisë në BE, për shkak të zhvillimeve të
fundit në Kosovë”, ka deklaruar Weber për “Blic”.

Sipas tij, Gjermania po kërkon gjetjen e mënyrës që pavarësia e
Kosovës në Beograd të pranohet si realitet, por të mos formalizohet.

“Pala serbe në fund duhet patjetër të vendos se çfarë do të bëjë me këtë çështje”. /Telegrafi/