PS, kallëzim penal për Berishën

Në Shqipëri shumica qeverisëse dhe opozita e majtë kanë ashpërsuar marrëdhëniet midis tyre, ndërsa komuniteti ndërkombëtar përsërit thirrjet për të zgjidhur krizën politike në vend.
Partia Socialiste ka dorëzuar të hënën në prokurori një kallëzim penal ndaj kryeministrit Sali Berisha, duke e akuzuar se ka kërcënuar me vdekje gjatë një seance të ndezur parlamentare në legjislaturën e kaluar deputetin socialist Taulant Balla.

Ky hap shihet si përgjigje ndaj shumicës e cila pak ditë më parë dorëzoi në prokurori një kallëzim të ngjashëm penal ndaj deputetit socialist Tom Doshi, për kërcënim me vdekje gjatë një seance të parlamentit ndaj një deputeti demokrat Gent Strazimiri.

Fryma e konfliktiti ka vazhduar edhe më tej ndërsa kryeministri Berisha ka akuzuar kreun e opozitës Edi Rama, njëherazi kryetar i Bashkisë së Tiranës, se ka rritur të paktën tre herë taksat ndaj biznesit në kryeqytet.

Sipas analistëve këto zhvillime duket se errësojnë perspektivën e zgjidhjes së krizës politikë në vend, krizë që pengon proceset integruese të vendit.

Sipas analistëve, vetë fakti që ministrat e jashtëm të BE diskutojnë në Luksenburg çështjen e Shqipërisë përbën një lloj ndëshkimi për politikën shqiptare e cila pas afro dy dekadash zhvillimesh demokratike vazhdon të gjenerojë situata krize dhe të tregojë paaftësi për t'i zgjidhur ato. /bbc/