Dega e LDD-së në Suharekë kaloi në AAK

Dega e Lidhjes Demokratike të Dardanisë në Suharekë, me të gjithë anëtarësinë e saj, ka vendosur sot t’iu bashkëngjitet radhëve të Aleancës për Ardhmërinë e Kosovës- thuhet në një kumtesë për media të AAK-së të lëshuar të enjten.
Në kumtesë thuhet se këtë e ka konfirmuar edhe kryetari i kësaj Dege, Muhamet Bajraktari, i cili ka bërë të ditur se me një vendim të posaçëm, pjesa dërmuese e Kryesisë së Degës së LDD-së në Suharekë dhe anëtarësia e gjerë e saj, prej sot janë pjesë e Aleancës për Ardhmërinë e Kosovës.

Arsyeja e këtij kalimi thuhet të jetë “koncepti dhe vizioni i Aleancës për Ardhmërinë e Kosovës dhe lidershipi i kryetarit Haradinaj”, të cilat “janë garanca më e mirë për vendin, të sotmen dhe të ardhmen e qytetarëve të Kosovës”, prandaj “duke e parë që AAK është alternativa e vetme e udhëheqjes së duhur të Kosovës, prej sot, Dega e LDD-së në Suharekë iu bashkohet radhëve të AAK-së”