Dega e AKR-së në Gjakovë nuk ka kaluar në AAK

Aleanca Kosova e Re thotë se njoftimi i plasuar në opinion për kalimin e degës së AKR-së në Gjakovë në AAK, nuk është i vërtetë, porse ajo që ka ndodhur është kalimi i tre përfaqësuesve të Kryesisë së AKR-së në Aleancën për Ardhmërinë e Kosovës.
“Çfarë realisht ka ndodhur, është kalimi i tre përfaqësuesve të Kryesisë së AKR-së në AAK për qëllime personale dhe interesit të ngushtë të këtyre personave që nuk reflekton në asnjë mënyrë në performancën e degës së AKR-së në Komunën e Gjakovës”, thuhet në një sqarim të AKR-së.

Sipas drejtuesve të AKR-së, me transferët e fundit, “erdhi koha e zbulimit të personave të cilët kanë qëndruar me AKR-në për interesa personale, ndërsa kanë punuar për AAK-në”.

Më tej në komunikatë thuhet se degës së AKR-së në Gjakovë, i është hapur rruga që në mënyrë të mirëfilltë të zbatojë reformën e filluar dhe të finalizojë përgatitjet për zgjedhjet e 12 dhjetorit.