Thellohet kriza franceze

Kombëtarja franceze ka hyrë edhe zyrtarisht në krizën më të thellë në histori të saj, pasi futbollistët janë ndarë në klane dhe për shkak të mosmarrëveshjeve mes trajnerit Raymond Domenech dhe futbollistëve, stërvitja e të dielës nuk është zhvilluar.
L’Equipe pohon se Raymond Domenech ka pasur një diskutim të nxehtë me Patrice Evran dhe trajnerin e fitnesit Robert Duverne, që ka rezultuar në kthimin e lojtarëve nga stërvitja në autobusin e tyre, prej nga kanë shkuar në hotelin e ekipit për t’u rigrupuar, pa bërë stërvitjen.

Në mes të këtij kaosi, drejtori i Federatës Franceze të Futbollit (FFF), Jean-Louis Valentin, ka thënë se do të japë dorëheqje nga pozita e tij.

Gjithë kjo katrahurë mësohet të jetë krijuar për shkak të pakënaqësisë së lojtarëve me vendimin e Raymond Domenechut që ta përjashtojë nga ekipi Nicolas Anelkan, pas fyerjeve të rënda të këtij të fundit ndaj përzgjedhësit francez.