Thellohet bashkëpunim ndërkufitar me Shqipërinë

Në kuadër të Komponentës së dytë të Instrumentit të Para-Anëtarësimit (IPA) të Komisionit Evropian e cila ka të bëjë me Bashkëpunimin Ndërkufitar (BNK), të premten në Prizren u nënshkrua marrëveshja e financimit të programit të Bashkëpunimit Ndërkufitar midis Kosovës dhe Shqipërisë.

Në ambient të hapur në sheshin pranë shatërvanit të Prizrenit, marrëveshja u nënshkrua në emër të Qeverisë së Kosovës, nga ana e ministres së Integrimit Evropian, Vlora Çitaku, dhe ministres se Integrimit Evropian të Republikës së Shqipërisë, Majlinda Bregu.

Me publikimin e Komunikatës të Komisionit Evropian “Kosova - Përmbushja e perspektivës Evropiane” me 14 tetor 2009, Kosovës i është mundësuar përfshirja në komponentin e dytë të IPA që është Bashkëpunimi Ndërkufitar (BNK). Në prill 2010 Kosova ka finalizuar programin e Bashkëpunimit Ndërkufitar me Maqedoninë dhe Shqipërinë, të cilat programe janë aprovuar nga Komisioni Evropian në dhjetor të të njëjtit vit.

Qëllimi i përgjithshëm i programit është të promovojë bashkëpunimin ndërmjet njerëzve dhe institucioneve të zonave kufitare me qëllim të rritjes së zhvillimit ekonomik, zhvillimit të ambientit dhe kohezionit shoqëror në mënyrë të qëndrueshme. /Telegrafi/