Skenari’ i daljes nga kriza institucionale

‘Skenari’ i daljes nga kriza institucionale

Me qëllim të kapërcimit të krizës institucionale, e cila u shkaktua me daljen e Lidhjes Demokratike nga koalicioni qeverisës, zgjedhjet e jashtëzakonshme pritet të mbahen më 12 dhjetor. Ndryshimi i draftligjit zgjedhor, që u bë të premten, është akti i parë i përgatitjes për mbajtjen e këtyre zgjedhjeve, ndërkohë që java që vjen do të jetë përplot zhvillime të reja në skenën politike.
Pjesa tjetër e skenarit që sipas Klan Kosova do ta shpije vendin drejt votimeve të jashtëzakonshme është si më poshtë:

Të dielën PDK-ja mban kuvendin e saj zgjedhor.

Të hënën Bujar Bukoshi do të heq dorë nga gara për kryetar të LDK-së. Të njëjtën ditë, ai dhe Ukë Rugova dhe grupi i tyre i njerëzve në këtë parti do të bëjnë publik vendimin për të hyrë në zgjedhje me një listë tjetër, të cilës do t’i prijë i biri i presidentit të ndjerë, Ibrahim Rugova.

Të martën do të dorëzohet mocioni i votëbesimit për qeverinë e Kosovës në kryesinë e kuvendit. Ai pritet të jetë i nënshkruar nga 62 deputetë. Të premten, siç merr vesh Klan Kosova, atë e kanë firmosur 25 parlamentarë edhe nga partitë opozitare, me përjashtim të AAK-së.

Të mërkurën ose të enjten mbahet seanca e Kuvendit ku fillimisht do të miratohet ligji zgjedhor dhe disa projektligje tjera e më pas do të vihet në rend dite mocioni i votëbesimin ndaj qeverisë. Pasi ai të ketë kaluar, ushtruesi i detyrës së presidentit të vendit do të shpërndajë Kuvendin, po atë ditë. Kryeministri dhe ministrat do të jenë në dorëheqje deri në datën e zgjedhjeve.

Një ditë më pas, presidenti në detyrë, Krasniqi, do të caktojë datën e zgjedhjeve të jashtëzakonshme, që duhet të jetë 40 deri në 45 ditë më pas. Kjo i bie që votimet mbahen më 12 dhjetor.

Shtatë deri dhjetë ditët e ardhshme do të jenë afati kur subjektet politike duhet të aplikojnë për certifikim në mënyrë që të bëhen pjesë e garës zgjedhore. Bashkë me to shkojnë edhe listat e tyre zgjedhore.

E shtuna e javës së ardhshme, ose 30 tetori, pritet të jetë dita kur LDK-ja do ta mbajë Kuvendin e saj zgjedhor, në të cilin Fatmir Sejdiu do ta ketë për kundërkandidat të vetëm Abraham Gashin. Deri në këtë ditë pritet të caktohet numri i delegatëve për këtë tubim të madh të partisë së dytë ne vend.