Kriza institucionale vonoi njohjet e reja të Kosovës

Kriza institucionale vonoi procesin e njohjeve të reja sa i përket
pavarësise së Kosovës. Kështu deklaroi në Tiranë zëvendësministri i
Jashtëm i Kosovës, Ibrahim Gashi, i cili nënvizoi se tani e tutje lobimi
do të jetë më i madh. Ai ka takuar zëvendësministren e Jashtme të
Shqipërisë Edit Harxhi "U morëm me ndërtimin e institucioneve të
brendshme dhe lobimi ka qenë i zvogëluar. Megjithatë, ka ngelur
komuniteti i vendeve që po shqyrton njohjen, që janë nën influencën e
vendeve si Serbia. Tani do të ketë një angazhim më të madh të
institucioneve të Kosovës", pohon Gashi. Sipas tij, deklaratat për
ndarjen e Kosovës nga zyrtarët e lartë të Beogradit janë pjesë e një
loje politike në Serbi, në funksion të zgjedhjeve që po afrohen. "Ky vit
është vit zgjedhor në Serbi dhe klasa politike do përdorë kartën e
nacionalizmit ekstrem për të fituar. Është për të ardhur keq, që një gjë
e tillë vjen edhe nga forca që vetëquhen demokratike në Serbi. Por
Kosova e pavarur tashmë është një realitet i pranuar", shton Gashi.