Thaçi garanton: S’do të ketë hapje të çështjes së statusit

Unë kam besim të plotë se BE-ja, edhe pas prezantimit të opinionit të GJND-së, do të ketë një qëndrim unik për të ardhmen e Kosovës për tu integruar edhe në NATO dhe në BE, por edhe për relacionet e reja të çështjeve praktike edhe me Serbinë si dy shtete të veçanta, të integruara në strukturat euroatlantike- ka thënë kryeministri Hashim Thaçi me t’u kthyer nga vizita në Bruksel.
“E di që opinioni i GJND-së është duke u pritur me padurim nga të gjithë, por duhet të siguroj dhe garantoj të gjithë qytetarët e Kosovës se në asnjë rrethanë nuk do të ketë kthim prapa dhe nuk do të ketë hapje të çështjes së statusit e gjithashtu as të çështjes së integritetit territorial të Republikës së Kosovës", ka thënë kryeministri.

Thaçi vlerësoi se nga drejtuesit e lartë të BE-së dhe të shtetit belg, ka marrë mbështetje të fuqishme për proceset në Kosovë dhe të ardhmen e saj në BE. Ai ka thënë se në takimin e me komisionarin Fule ka kërkuar përshpejtimin e perspektivës evropiane të Kosovës, ndërsa në takimin me baroneshën Ashton kanë diskutuar edhe “për përgatitjet me rastin e prezantimit të shpejtë të opinionit të GJND-se për Kosovën ku do të përmbyllet çështja ligjore e këtij procesi dhe do të hapë një kapitull të ri”. /rtv21/