Anuloi golin e SHBA-së, degradohet në mbajtës semafori

Johannesburg, 20 qershor – Pas ndeshjes SHBA-Slloveni, e cila përfundoi me rezultat 2:2, udhëheqësit e organizatës botërore të futbollit e kanë suspenduar përkohësisht referin kryesor të asaj ndeshje Koman Coulibaly nga Mali, i cili për arsye ende të panjohura kishte anuluar golin e tretë të amerikanëve.

Së pari përflitej që Coulibalyn do ta kthenin në shtëpi, ndërsa më pastaj është vendosur që ai edhe më tej të mbetet arbitër në këtë botëror. Mirëpo, ai nuk do të referojë më ndeshje si arbitër kryesor, por do të jetë vetëm gjyqtar i katërt i ndeshjes, kështu që në vend të vendimeve të rëndësishme do të mbajë semaforin e vogël në duar dhe do të verifikojë veshmbathjet e lojtarëve zëvendësues me rastin e hyrjes së tyre në fushë.

Gjithsesi, ky është vetëm një vendim i përkohshëm. Për fatin e tij të mëvonshëm do të vendoset pas analizës së hollësishme nga ana e FIFA-s. Atij ose do t’i ndalohet gjykimi në ndeshje, ose do ta kthejnë në vendin e gjyqtarit në fushë.