Naftëtari paralajmëroi BP për rrjedhjen e naftës

Naftëtari paralajmëroi BP për rrjedhjen e naftës

Një naftëtar në platformën Deepwater Horizon e cila shkaktoi rrjedhjen e naftës në Gjirin e Meksikës i ka thënë BBC-së se ai kishte vënë re një rrjedhje në pjesën e penguesit të shpërthimit disa javë përpara se ai të shpërthente.
Kjo aparaturë e cila është projektuar për të mbyllur pusin në rast emergjence, dështoi në ditën e katastrofës.

Tyrone Benton operonte një pajisje nënujore robotike në platformën Deepwater Horizon.

Penguesi i shpërthimit është pjesa më kritike e pajisjeve të emergjencës në platformat e naftës.

Ajo ka prerëse gjigante për të prerë dhe mbyllur tubacionet kryesore në rast emergjence.

Tyrone Benton tha se supervizori i tij i dërgoi lajmin e rrjedhjes me email si kompanisë BP, ashtu dhe Transocean, kompanisë që e ka në pronë platformën.

Por Benton tha se aparatura e kontrollit duhej riparuar duke pezulluar përkohësisht operacionet e shpimit.

Kjo do të kishte qenë një perspektivë e shtrenjtë pasi i kushtonte BP gjysmë milionë dollarë në ditë për të operuar gjatë muajit prillit platformën Deepwater Horizon.

BP ka reaguar duke thënë se Transocean ka qenë përgjegjëse si për mirëmbajtjen ashtu edhe për funksionimin e kësaj aparature.

Transocean thotë se aparatura ishte testuar tre ditë më parë dhe funksiononte. /bbc/