Krimi dhe korrupsioni po e pengojnë të ardhmen e Kosovës

Krimi dhe korrupsioni po e pengojnë të ardhmen e Kosovës



Organizatat e Shoqërisë Civile në Kosovë, nëpërmjet një
deklarate të përbashkët për media, kanë prezantuar të enjten qëndrimin e
tyre sa i përket zhvillimeve të fundit të Kosovë në fushën e sundimit
të ligjit, duke përfshirë edhe hetimet e EULEX-it për korrupsion.Nëpërmjet
kësaj deklarate, OJQ-të e Kosovës shprehin mbështetjen e tyre të
fuqishme për angazhimin e Prokurorisë Speciale të Kosovës dhe EULEX-it
për të luftuar korrupsionin dhe krimin e organizuar në Kosovë.
“Qytetarët e Kosovës, bashkësia ndërkombëtare, si dhe Qeveria e
Kosovës kanë kërkuar një angazhim konkret dhe të vendosur nga prokuroria
dhe gjyqësia kosovare, duke theksuar se askush nuk është mbi ligjin.
Përderisa përshëndesim angazhimin e Prokurorisë Speciale dhe EULEX që të
hetojnë dyshimet për korrupsion, ne kërkojmë dhe presim që këto hetime
të prodhojnë rezultate konkrete”, thuhet në deklaratë.
Një zmbrapsje nga iniciativa aktuale, sipas këtyre organizatave, do
të ishte një goditje shumë e dëmshme për Sundimin e Ligjit dhe sigurinë
në Kosovë. “Krimi i organizuar dhe Korrupsioni po e pengojnë të ardhmen
Evropiane të Kosovës dhe luftimi i këtyre fenomeneve nuk guxon të lihet
në mëshirën e agjendave të politikës ditore dhe interesave personale”,
theksohet në deklaratë.
Reagimet e udhëheqësve të Qeverisë dhe Kuvendit të Kosovës, si dhe të
partisë më të madhe në vend, të bëra ditëve të fundit ndaj punës së
organeve të drejtësisë, theksojnë këto organizata, “na bëjnë të
shqetësohemi ngase lejojnë hapësirë për dyshime në përkushtimin e
sinqertë të tyre në luftën kundër korrupsionit dhe krimit të
organizuar”.
“Diskursi publik që Qeveria e vendit po ndërton ditëve të fundit duke
prezantuar punën e prokurorisë si ndërhyrje në institucionet e shtetit
përbën kërcënim për punën e pavarur të organeve të drejtësisë. Tendencat
për të prezantuar punën e organeve të drejtësisë si të rrezikshme për
stabilitetin e vendit janë një kërcënim tjetër serioz për forcimin e
sundimit të ligjit në Kosovë”, theksohet më tej.
Ndryshimi i retorikës së Qeverisë së Republikës së Kosovës ndaj
Bashkësisë Ndërkombëtare pas bastisjeve në Ministrinë e Transportit dhe
Telekomunikacionit, sipas këtyre organizatave, është i papranueshëm për
më tepër është i dëmshëm për interesat e vendit.
“EULEX duhet të krijojë hapësirë për përfshirjen e Prokurorëve
kosovarë si dhe të sigurojë se edhe pas përfundimit të Misionit EULEX,
Prokuroria Kosovare do të jetë në gjendje që me sukses të ndjekë dhe
luftojë krimin e organizuar dhe korrupsionin”, përfundon deklarata e
përbashkët e OJQ-ve.

Kjo deklaratë është nënshkruar nga: Klubi për Politikë të Jashtme,
Instituti për Kërkime dhe Zhvillime të Politikave (KIPRED), Rrjeti
Ballkanik i Gazetarisë Hulumtuese – BIRN-Kosova, Lëvizja FOL, Rrjeti i
Grave te Kosovës, Internews Kosova, Crossing Bridges, Forumi për
Iniciativa Qytetare (FIQ), Fondacioni Kosovar për Shoqëri Civile (KCSF),
Instituti për Studime të Avancuara (GAP), Nisma e të Rinjve për të
Drejtat e Njeriut (YIHR), Instituti Demokratik i Kosovës (KDI),
Instituti i Prishtinës për Studime Politike (PIPS), Qendra Kosovare për
Bashkëpunim Ndërkombëtar (KCIC), Instituti Ballkanik i Politikave
(IPOL), Syri i Vizionit, Iniciativa për Progres (INPO) dhe Ndërtimi i
Komuniteteve Mitrovicë (CBM)