Një kompani turke premton punësim për dhjetë mijë shqiptarë

Një kompani turke premton punësim për dhjetë mijë shqiptarë

Dhjetë mijë punësime për popullatën e rajonit të Pollogut ka premtuar një kompani nga Turqia, në rast se fiton menaxhimin me zonën e lirë ekonomike të Pollogut, njoftojnë për “Lajm” burime qeveritare.
Për dallim prej zonave tjera të cilat menaxhohen nga Drejtoria për zona të lira ekonomike, zona e lirë ekonomike e Pollogut thuhet se do të menaxhohet nga një kompani, e cila vetë do të sjellë investitorë.

Të martën do të fillojnë solemnisht punimet për rregullimin e infrastrukturës së zonës së lirë ekonomike të Pollogut, kurse vitin e ardhshëm do të shpallet edhe tenderi publik për dhënien e saj në koncesion.

Takimet me përfaqësuesit e kësaj kompanie i kanë zhvilluar personalisht zëvendëskryeministri Abdylhaqim Ademi dhe ministri i ekonomisë Fatmir Besimi, gjatë pjesëmarrjes javën e kaluar në një forum ekonomik në Stamboll.

Kjo kompani ka premtuar se në zonën e lirë ekonomike të Pollogut fillimisht do të sjellë pesë kompani të mëdha turke, kurse më pas edhe kompani tjera të mëdha ndërkombëtare.

“Deri tani kemi oferta nga shumë shtete. Janë paraqitur kompani nga Norvegjia, Sudeia, India, Turqia, e kështu me radhë. Mirëpo interesim më serioz kanë treguar një kompani turke dhe një kompani nga Norvegjia”, deklaroi për “Lajm”, ministri i Ekonomisë Fatmir Besimi.

Burimet qeveritare për “Lajm” thonë se edhe kryeministri turk Recep Tayyip Erdogan ka premtuar se do të angazhohet personalisht për ardhjen e kësaj kompanie në zonën e Pollogut, si dhe për ardhjen e kompanive tjera turke në Maqedoni.