Ministri Rexhepi kritikoi policinë kufitare për rastin e “Gardës Car Llazari”

Prishtinë, 25 qershor - Ministri i Punëve të Brendshme, Bajram Rexhepi, e cilësoi si ndërhyrje të dhunshme, hyrjen e një grupi prej rreth 30 serbëve në veri të Kosovës. Ai i ka kritikuar pjesëtarët serbë të policisë së Kosovës, të cilët nuk e kanë kryer detyrën me përgjegjësi në pikën kufitare në veri.

Ndërkohë Policia e Kosovës do të përcjellë në mënyrë të organizuar për në Gazimestan, serbët që kanë hyrë nga Serbia në Kosovë dhe që tashmë janë në pjesën veriore dhe më 28 qershor do të shënojnë festën e Vidovdanit. Në mesin e tyre është edhe një grup prej rreth 30 serbësh, që dje kanë hyrë dhunshëm pa iu përgjigjur policisë.

Ata i kishin kërcënuar policët e Kosovës në pikën kufitare, duke vazhduar rrugën këmbë në drejtim të Leposaviqit dhe Mitrovicës. Këtë grup e përbënin persona nga e ashtuquajtura “Garda Car Llazarit” dhe të grupit fashist “Obraz”, e që dyshohet se ishin të armatosur.

Policia kufitare e Kosovës ka kërkuar ndihmë nga njësitë speciale të Kosovës dhe ato të EULEX-it. Më tej, burimi ka shtuar se EULEX-i ka dhënë dritën e gjelbër që individët e grupit të serbëve që kanë dhunuar kufirin e Kosovës të arrestohen