Vritet në atentat ndihmësministri grek i Rendit

Athinë, 24 qershor- Mediat greke kanë raportuar se sonte në kryeqytetin e Greqisë ka shpërthyer një bombë në katin e 7-të të godinës së Ministrisë së Rendit, ndërsa ka mbetur i vdekur një nga ndihmësi i ministrit Chrisochoidis dhe një person tjetër është plagosur.

Shpërthimi ka ndodhur në orën 20:00. Sipas mediave greke, viktima quhet Jorgos Vasilakis, 52 vjec, ndihmës ministër i Rendit, ndërsa bomba ishte vendosur në një pako që cila ka shpërthyer në momentin e hapjes së saj nga viktima. Raportohet se në zyrën ku shpërtheu bomba, ndodhej dhe një person i dytë, i cili është plagosur rëndë.

Sipas mediave greke shpërthimi ishte shumë i fortë, aq sa u lëkundën muret e zyrës ngjitur. Ende nuk është e qartë nëse ministri i Brendshëm ndodhej në godinë në momentin e shpërthimit. Është hera e parë që një shpërthim i tillë ndodh pikërisht në zemër të Ministrisë së Rendit, një vend i pajisur me forca sigurie dhe kamera.