Vritet Osama bin Laden

Osama bin Laden, udhëheqësi i rrjetit terrorist të Al Qaedas është vrarë në një operacion të forcave amerikane në Pakistan. Ai është vrarë nga forcat e ushtrisë amerikane në një bujtinë që ishte rreth 100 kilometra në veri të kryeqytetit të Pakistanit, Islamabad bashkë me disa anëtar të familjes së tij, ka thënë një zyrtar amerikan për CNN.
Lajmi u bë i ditur nga presidenti Barack Obama. Truri i sulmeve të 11 Shtatorit 2001 në Shtetet e Bashkuara u vra brenda territorit të Pakistanit dhe SHBA-të kanë trupin e Bin Ladenit.

"Vdekja e bin Ladenit shënon një nga arritjet më të rëndësishme të vendit tonë në luftën kundër Al Qaedas. Por vdekja e tij nuk shënon fundin e përpjekjeve tona. Nuk ka dyshime se Al Qaeda do të vazhdojë të përpiqet të na sulmojë. Ne duhet dhe do të jemi vigjilent si brenda dhe jashtë", tha presidenti Obama.
Presidenti amerikan tha se forcat amerikane që morën pjesë në operacionin e vrasjes së Bin Ladenit nuk pësuan asnjë humbje.

Raportet e para flasin për një sulm të forcave të SHBA-ve drejtuar ndaj një vile jashtë Islamabadit dhe pati luftime në vendin e ngjarjes.

Obama falenderoi presidentin e Pakistanit Asif Ali Zardari për bashkëpunimin.

"Ne duhet të rikonfirmojmë se Shtetet e Bashkuara nuk janë e kurrë nuk do të jenë në luftë me islamin. E kam bërë të qartë ashtu siç e tha dhe presidenti Bush pas 11 Shtatorit se lufta jonë nuk është kundër islamit, Bin Ladeni nuk ishte udhëheqës i myslimanëve, por një vrasës masiv i myslimanëve. Al Qaeda ka masakruar myslimanë në shumë vende përfshi këtu tek ne. Ikja e tij do të mirëpritet nga të gjithë ata që besojnë tek paqja dhe dinjiteti njerëzor", tha Obama.

Mijëra njerëz janë mbledhur përpara Shtëpisë së Bardhë dhe në vendin ku dikur ishin kullat binjake në New York duke valëvitur flamuj amerikanë. Rreth 3000 njerëz u vranë nga sulmet terroriste në SHBA më 11 Shtator 2001.



Presidenti Obama përpara se të bëjë lajmin publik ka informuar presidentin Bush dhe Clinton. Presidenti Bush përmes një deklarate tha se kjo ishte “fitore e madhe për Amerikën”.

Kryeministri britanik ka qenë ndër të parët që ka reaguar pas vrasjes së bBn Ladenit. David Cameron tha se vdekja e Bin Ladenit ka sjellë "lehtësim të madh" në të gjithë botën.

Kryebashkiaku i New Yorkut, Michael Bloomberg tha se shpreson që lajmi të ndihmojë të afërmit e viktimave të 11 shtatorit. /Telegrafi/