Në Britani zbulohet dokumenti rreth ekzekutimit të Drazha Mihajloviqit

Londër, 25 qershor - Në Arkivin mbretëror britanik është gjetur një dokument që mban fshehtësinë rreth ekzekutimit të gjeneralit Drazha Mihajloviq. Në mesin e dhjetëra mija faqeve të Arkivit mbretëror britanik që kanë të bëjnë me Serbinë në periudhën 1941-1946 është gjetur edhe në dosje që mban emrin Drazha Mihajloviq, data 17 korrik 1946. Kjo është pikërisht data e ekzekutimit të këtij komandanti të lëvizjes së çetnikëve. Për këtë arsye besohet se ky dokument i kërkuar për një kohë të gjatë fsheh të dhëna të detajuara rreth vendit, mënyrës dhe kohës së ekzekutimit të tij.
Dokumenti, megjithatë, mban dy vula sekreti. Njëra prej tyre është vula e Ministrisë së Jashtme britanike. Në afat prej disa ditësh, komisioni serb që merret me këtë çështje do të kërkojë nga "Foreign Office" heqjen e vulës së sekretit, përderisa nga pala britanike ka marrë garanci se një gjë e tillë do të realizohet.
Slobodan Homen, sekretar serb në Ministrinë e Drejtësisë, ka sqaruar se duke pasur parasysh se dokumenti është i mbrojtur, askush nuk e di përmbajtjen e tij. Atë e kishte gjetur një delegacion treanëtarësh i komisionit, që tri ditë më parë ishte kthyer nga Britania e Madhe, ku kishte pasur në dispozicion shumë dokumente të Arkivit mbretëror britanik, ku ruhen edhe dokumentet e shërbimit britanik të inteligjencës.
Delegacioni para vetes kishte pasur dhjetëra mijëra faqe që flasin për periudhën 1941-1946.
Historianët serbë kanë thënë se ato dokumente janë shumë interesante dhe hedhin një dritë të re mbi ngjarjet historike në Serbi. Në disa dhjetëra dosje përmendet edhe emri i Drazha Mihajloviqit. Ato dosje i janë dorëzuar palës serbe dhe pritet që posa të kopjohen, përmbajtja e tyre të bëhet e ditur, ka thënë Homen.
Anëtarët e komisionit kanë bërë të ditur se janë zbuluar edhe dokumente të shërbimeve britanike rreth puçit shtetëror në Serbi, në natën midis 26 dhe 27 marsit të vitit 1941, kur u dëbua nga pushteti Pavle dhe u formua qeveria e re.