Në Maqedoni me të madhe konsumohet heroina

Përdoruesit e drogës në Maqedoni më së shumti përdorin lëndën narkotike heroinë dhe kjo lloje droge është më e pranishme në tregun e zi. Kjo e dhënë është kumtuar në raportin e Kombeve të Bashkuara me titullin “World Drug Report 2010”.
Përveç Maqedonisë, heroina është e pranishme edhe në Bullgari dhe Shqipëri. Në këto tre vende, kjo lëndë narkotike shfrytëzohet nga 0,5 për qind e popullsisë. Kërkesat për drogë për çdo ditë janë më të mëdha në vendet që janë në zhvillim, duke përfshirë kryesisht Evropën Juglindore.

Kroacia radhitet ndër vendet e para ku përdoret me të madhe kanabisi apo marihuana, ndërsa pas saj pasojnë Serbia, Bosnjë-Hercegovina si dhe Bullgaria.

Droga sintetike është më e pranishme në Bosnjë, Bullgari, dhe më pak në Shqipëri dhe Rumani.

Raporti i Kombeve të Bashkuara evidenton rënien e prodhimit të kokainës dhe heroinës, edhe ate për 18 për qind nga viti 2007 e deri në vitin 2009. Tregu për kërkesat për këtë lloj droge po përhapet në Amerikën Veriore dhe Evropë. Në vitin 2008, në botë prej 150 milion e deri në 250 milion njerëz kanë konsumuar së paku njëherë lëndë narkotike. /INA/