Maqedoni, shpenzimet sjellin FMN-në

Fondi Monetar Ndërkombëtar (FMN) javën e ardhshme do të mbërrijë
në një mision në Shkup për të biseduar me autoritetet qeveritare.
Delegacioni i udhëhequr nga Ves MekGru do të kryejë kontrollin rreth
harxhimeve të parave nga kredia e huazuar nga Maqedonia. Përveç
revizionit të aranzhmanit, monetarët do të skanojnë edhe harxhimet e
tjera buxhetore, nivelin e deficitit në arkën shtetërore si dhe borxhin
publik që ka vendi. Delegacioni i FMN-së do të qëndrojë për
shtatë ditë, ndërsa përshtypjet dhe vlerësimet e tyre do t’i japin në
ditët e fundit të vizitës. Sipas projeksioneve buxhetore, Qeveria këtë
vit planifikon të harxhojë 190 milionë euro më shumë nga të ardhurat e
përgjithshme në buxhet.
Qeveria e Maqedonia disa muaj më parë para zgjedhore arriti të
përfitojë kredinë prej 220 milionë eurove nga FMN-ja. Deri tani nuk
dihet se sa nga këto para janë tërhequr nga arka e FMN-së dhe sa janë
harxhuar. /Telegrafi/