Partitë nuk i raportojnë Kuvendit për shpenzimet

Administrata e Kuvendit të Kosovës nuk merr raporte nga partitë politike për shpenzimin e mjeteve publike që ua ndan në kuadër të fondit për demokratizim. Partive gjatë vitit të kaluar u ishin shpërndarë 1 milion e 892 mijë e 219 euro nga Administrata e Kuvendit të Kosovës, por ato e kishin shkelur memorandumin e mirëkuptimit për shfrytëzimin e këtyre fondeve.

“Gjatë periudhës tetor-dhjetor, vetëm 2 nga 27 subjektet politike kishin dorëzuar raportet tremujore të shpenzimeve për këtë periudhë”, theksohet në raportin e Zyrës së Auditorit të Përgjithshëm për financat e administratës së Kuvendit të Kosovës, shkruan Koha Ditore.

Auditorët kanë konstatuar se partitë nuk i ishin përmbajtur gjatë vitit të kaluar marrëveshjes së nënshkruar me administratën e Kuvendit të Kosovës. “Për shkak të mungesës së raportimit për shpenzimet e ndodhura ka munguar transparenca në subvencionet e dhëna partive politike”, theksohet në këtë raport.

Sipas auditorëve, marrëveshja e mirëkuptimit me partitë politike obligon secilën parti politike që t’i dorëzojë sekretarit të administratës së Kuvendit të Kosovës një raport detaj të shpenzimeve për tremujorin paraprak.

“Ky raport duhet të dorëzohet brenda tri javësh nga mbyllja e secilit tremujor. Në të kundërtën, nuk do të bëhet transferimi i mjeteve për tremujorin e ardhshëm”, theksohet në raportin e auditorëve.

Nga shuma prej mbi 1 milion e 800 mijë eurove, sipas auditorëve, 95 për qind e tyre u ndahen partive politike sipas numrit të vendeve të fituara në zgjedhjet për Kuvend dhe 5 për qind për financimin e grupeve parlamentare. /Telegrafi/