Shteti përgjysmon fondet për partitë politike

Ministria e Financave e ka përgjysmuar fondin për financimin e partive politike nga 4 868 e 981 euro në 2.4 milionë. Ndonëse në Ligjin për buxhet ende figuron shuma e parë, në Komisionin Qendror të Zgjedhjeve (KQZ) tashmë ka shkuar “korrigjimi buxhetor” i ministrisë, që partitë nuk mund të përfitojnë më shumë se gjysmën e mjeteve të premtuara.

Subjektet politike nuk do të mund t’i marrin nga 40 mijë euro për çdo deputet që e kanë në Kuvendin e Kosovës, por vetëm nga 20 mijë. Në fakt, shuma prej 4.8 milionëve nuk ka qenë në harmoni me Ligjin për financimin e partive politike, pasi në këtë ligj parashihet që partitë politike të përfitojnë 0.17 për qind të buxhetit të përgjithshëm vjetor, e jo 0.33 për qind, sa u ishin ndarë në mars.

Ndonëse me Ligjin për financimin e partive politike KQZ-së i jepet e drejta për t’i ndalur nga fondi për parti, gjobat që atyre u janë shqiptuar nga Paneli Zgjedhor për Ankesa dhe Parashtresa (PZAP), një gjë e tillë nuk ka ndodhur. Kryesuesi i Sekretariatit të PZAP-it, Mulë Desku ditë më parë ka konfirmuar për Kohën Ditore se deri tani janë vetëm tri subjekte politike që i kanë paguar gjobat, nga gjithsej 11 sosh, sa janë gjobitur në zgjedhjet e parakohshme parlamentare të 12 dhjetorit 2010, rivotimit me 9 dhe 23 janar 2011.

Ndërkohë, burime brenda KQZ-së kanë bërë me dije se nga fondi prej më shumë se 2.4 milionë eurove, PDK-ja, e cila është gjobitur me 144 mijë e 200 euro, do t’i marrë 690 mijë e 710 euro; LDK-së me gjobën prej 88 mijë e 50 eurosh, do t’i takojnë 548 mijë e 505 euro, kurse AAK-së, e cila gjithashtu nuk e ka paguar gjobën prej 69 mijë e 600 eurosh, pritet t’i takojnë 243 mijë e 780 euro.

Nga fondi do t’i përftojë 162 mijë e 520 euro edhe Koalicioni për Kosovë të Re, që gjithashtu e ka të papaguar gjobën në shumë prej 42 mijë e 850 eurosh. Lëvizjes “Vetëvendosje” do t’i takojnë 243 mijë e 780 euro. /Telegrafi/