Partitë kanë nisur të bëjnë koalicione

Pragu zgjedhor prej 5 për qind, për zgjedhjet e ardhshme, i ka detyruar shumë subjekte politike të vogla të fillojnë kalkulimet politike.
Në prag të vendimit të zgjedhjeve të jashtëzakonshme parlamentare kanë filluar të marrin jetë edhe koalicionet parazgjedhore. Të ashtuquajturat koalicione matematikore vazhdojnë të jenë çështjet më të debatuara. Një pjese të madhe të partive doemos do t’u duhet të hyjnë në koalicione për të siguruar pjesëmarrjen në jetën parlamentare. PDK-ja në deklaratën e miratuar politike në kuvendin zgjedhor ka lënë mundësinë për bashkëpunim me të gjitha partitë politike pa dallim. Ndërsa LDK-ja e ndodhur në procesin e brendshëm zgjedhor deri më tani nuk ka zënë në gojë çështjen e koalicioneve, duke thënë se koalicionet janë pjesë e marrëveshjeve politike. Ndërkaq edhe forcat e tjera politike, AAK, AKR dhe LDD e lënë të hapur çështjen e koalicioneve zgjedhore. Por të gjitha këto veç AKR-së hëpërhë nuk flasin rreth çështjes së koalicioneve. Aleanca për Ardhmërinë e Kosovës, e cila e konsideron veten lokomotivë të së djathtës, në paraqitjet publike nuk preferon të flasë paraprakisht për koalicionet. Mirëpo ata, siç mësohet, kanë kontaktuar PSHDK-në dhe Partinë e re të Bashkimit Demokratik të udhëhequr nga Zafir Berisha. Por, ende nuk dihet nëse ka ndonjë marrëveshje konkrete.