Kushte për koalicione kanë të gjithë

Prishtinë, 23 janar - Ndërkohë që çdo ditë e më tepër i afrohemi përfundimit të procesit zgjedhor, çështja e formimit të qeverisë së ardhshme vazhdon të mbetet e paqartë, pasi që secila parti ka kushtet e saj për të hyrë në koalicionin qeverisës.
Kushte kanë të gjithë, shkruan sot gazeta Zëri.

PDK-ja që ka dalë si partia e parë në zgjedhjet e 12 dhjetorit, ka një sfidë të madhe para vetes - gjetjen e partnerëve për krijimin e koalicionit qeverisës.

Përpos AKR-së, e cila thuajse ka shprehur një gatishmëri më të madhe për të hyrë në koalicion me PDK-në, dhe disa zërave brenda AAK-së, të gjithë të tjerët thuajse janë kundër, shkruan Zëri.

LDK-ja si partia e dytë vazhdon të këmbëngulë se nuk do të hyjë në koalicion me partinë e kryeministrit në dorëheqje, Hashim Thaçi, ose ajo do të hynte me të vetmin kusht që të krijohet një qeverisje gjithëpërfshirëse, e cila si qëllim do të kishte përgatitjen e vendit drejt zgjedhjeve të reja.

Lëvizja “Vetëvendosje” e vetmja mbetet e pa lëkundur. Kaherë është përcaktuar qartë se nuk do të hyjë në kurrfarë koalicioni me asnjë parti, pra do të qëndrojë në opozitë.