LDK: Të gjithë të papunët në UP

Lidhja Demokratike e Kosovës kërkoi të mërkurën që Qeveria të zbatojë Strategjinë e Arsimit të Lartë 2005-2015, e cila ka përcaktuar kuotat, si dhe dinamikën e rritje së përfshirjes në studime në raport me numrin e popullsisë, për të arritur kuotat evropiane pa dëmtuar cilësinë.

LDK kërkoi që Qeveria të mos dëmtojë arsimin e lartë në mungesë politikash për punësimin e të rinjve dhe në mungesë të theksuar të politikave sociale.

“Qeveria e ka shpallur cilësinë prioritet, ndërsa Kosovën shtet të dijes. Ndërsa, cilësia në shkolla vijon të jetë e vogël dhe Kosova vijon të jetë shteti që për dijen investon më së paku në rajon”, thuhet në komunikatë.

Sipas LDK-së, me vendimin që në këtë vit akademik Universiteti i Prishtinës të regjistrojë 15 mijë e 503 studentë të rinj, Qeveria ka rrezikuar përfundimisht atë nivel cilësie që ky universitet ka ruajtur me mund të madh.

“Qeveria nuk ka marrë parasysh fare qëndrimet e Universitetit, gjë e provua dje në mbledhjen e Senatit”, thuhet në komunikatën e LDK-së. /Telegrafi/