Marrëveshjet në interes të gjithë qytetarëve

Përfaqësuesi civil ndërkombëtar, Pieter Feith, i ka përshëndetur marrëveshjet e arritura mes Republikës së Kosovës dhe Serbisë, dhe i ka përgëzuar negociatorët për qasjen e tyre të duruar dhe konstruktive.

“Këto rezultate na japin shpresë se dialogu në të ardhmen do të përfshijë edhe fusha të tjera dhe do të vazhdojë të ofrojë përfitime vërtet praktike për qytetarët. Kjo do të ndihmojë në krijimin e një modeli të angazhimit të respektueshëm fqinjësor, në promovimin e bashkëpunimit më të ngushtë rajonal dhe në avancimin e perspektivës evropiane për Kosovën dhe Serbinë”, ka deklaruar Feith.

Ai ka thënë se pret që të implementohen në kohë këto marrëveshje në mënyrë që të forcohet më tej besimi. /Telegrafi/