Marrëveshjet pa afate për zbatim

Sipas njoftimeve nga komunikata e lëshuar pas bisedimeve
Prishtinë-Beograd, që u mbajtën të shtunën në Bruksel, nuk janë dhënë
afate se kur do të mund të fillonte zbatimi i marrëveshjeve të arritura
ndërmjet palëve negociuse (regjistri civil, liria e lëvizjes dhe pranimi
i diplomave universitare dhe shkollore).“Marrëveshjet do të
hyjnë në fuqi sapo të jenë të zbatueshme nga aspekti operativ, ndërsa
implementimi dhe gjërat që pasojnë do të sigurohen nga një grup punues
trepalësh”, thuhet në deklaratën për shtyp të Këshillit të BE-së, ndërsa
shtohet se “të dyja palët kanë shprehur përkushtim të plotë për të
zbatuar atë që është arritur si pajtim”.
Siç shkruan e përditshmja Koha Ditore, zyrtarët të BE-së
kanë pohuar se nuk do të ketë nënshkrim të ndonjë marrëveshjeje, por
këto pika rreth të cilave palët kanë rënë dakord to të përfshihen në një
dokument të quajtur “konkluzione të kryesuesit”, ndërsa palët do të
marrin përgjegjësinë për të zbatuar pa pasur nevojë të nënshkruajnë.
Këto “konkluzione të kryesuesit” do t’u jepen palëve ndërkohë që në
BE të shtunën nuk është dhënë përgjigje nëse edhe ky dokument do të
bëhet publik, së paku për qytetarët, për të cilët edhe thuhet se ky
dialog po zhvillohet për t’u zgjidhur disa probleme praktike.
/Telegrafi/