Rexhepi: Policia ka tretman për të gjithë

Ministri i Punëve të Brendshme, Bajram Rexhepi, ka reaguar ndaj kërkesës së Lëvizjes “Vetëvendosje”, e cila ka kërkuar që ai të japë dorëheqje për shkak të fajësisë për dhunën e policisë ndaj shikuesve në ndeshjen basketbollistike Prishtina-Bambi.
“Unë nuk i dëgjoj fjalët e ‘Vetëvendosjes’, sepse kam punë më të rëndësishme sesa t’i dëgjoj fjalët e tyre, kështu që absolutisht ato nuk i kam regjistruar fare në tru, veç hyrje-dalje”, ka thënë Rexhepi për Kohën Ditore.

Ministri ka hedhur poshtë atë që e ka thënë “Vetëvendosje” se Policia e Kosovës nuk i trajton njëjtë shqiptarët dhe serbët.

“Policia ka tretman për të gjithë dhe ajo është e të gjithë qytetarëve, pavarësisht komuniteteve që u takojnë dhe kanë detyrë profesionale që ta bëjnë sigurinë, rendin dhe ligjin. Natyrisht që në pjesën veriore ka nga pak shmangie për arsye që i dimë të gjithë dhe për këtë çdoherë ndokush mundet të japë kritika, por kjo është përgjegjësi e përbashkët me EULEX-in dhe për këtë të gjithë jemi të vetëdijshëm për situatën se çfarë është”, ka thënë Rexhepi duke shtuar se “nuk ka dallim se cilit komunitet i takojnë qytetarët”. /Telegrafi/