Rexhepi: Rezultate të prekshme në MPB

Ministri i Punëve të Brendshme, Bajram Rexhepi, ka bërë prezantimin e raportit të punës 100 ditëshe të ministrisë që e drejton ai, ku janë përfshirë fushat dhe përgjegjësitë që i ka në bazë të Programit të Qeverisë 2011-2014.
Ministri Rexhepi ka vlerësuar se 100 ditëshi i MPB-së ka qenë i suksesshëm dhe janë arritur objektivat e parapara. Ai tha se në 100 ditëshin e parë, që nga krijimi i Qeverisë së re, MPB ka treguar vazhdimësi në zbatimin e politikave dhe projekteve të parapara në dokumentet strategjike.
“MPB ka vazhduar me kompletimin dhe plotësimin e kornizës kryesore strategjike, ofrimin e shërbimeve në lidhje me dokumentet e regjistrit dhe gjendjes civile, mbajtjen e rendit dhe të qetësisë publike, parandalimin dhe luftimin e të gjitha llojeve të krimeve dhe krimit të organizuar, kontrollin dhe mbrojtjen e kufijve, zbatimin e politikave të migrimit, menaxhimin e emergjencave si dhe ndërmarrjen e reformave të nevojshme në plotësimin e kritereve teknike për liberalizimin e vizave me BE-në”, ka thënë ministri Rexhepi.
Ky raport i është përmbajtur në masë të madhe rekomandimeve nga kryeministri Hashim Thaci dhe ngërthen në veti aktivitetet që kanë dhënë rezultate të prekshme dhe në zbatimin e politikave dhe legjislacionit që me indikatorë matës kanë rezultuar se ka pas sukses të theksuar, përfshirë ofrimin e shërbimeve për qytetarë, zbatimin në praktikë të politikave dhe ligjeve nën përgjegjësinë e MPB-së, reformimin institucional, zbatimin e projekteve kapitale, si dhe hartimin dhe kompletimin e kornizës legjislative dhe angazhimin konkret në zbatimin e kritereve për liberalizim të vizave me BE-në. /Telegrafi/