Bisedimet të imponuara - vështirë të japin rezultate

Bisedimet me Serbinë janë të imponuara nga rezoluta e Asamblesë së përgjithshme të OKB-së së vitit të kaluar dhe tani në një mënyrë ose në një tjetër me atë rezolutë ka qenë i ngarkuar Bashkimi Evropian që të jetë sponzorizues i këtyre bisedimeve. Kështu ka deklaruar kryetari i Kuvendit të Kosovës, Jakup Krasniqi, në një intervistë për Radion Evropa e Lirë.

Sipas tij, pala serbe nuk është shumë e disponuar për të zhvilluar bisedime dhe për të përfunduar këto bisedime me sukses, por e ka më shumë të imponuar dhe për të krijuar pozicione të avancuara në raport me Brukselin.

“Kjo na bën ne të dyshojmë se bisedimet jo vetëm që do të jenë të vështira, por do të zgjasin bukur gjatë dhe nuk do të japin rezultate që do t’iu duheshin qytetarëve të Republikës së Kosovës dhe qytetarëve të Serbisë. Në fund të fundit këto bisedime në fillimin e tyre kanë pasur për qëllim dhe synim rritjen e kualiteti të jetës së qytetarëve të tyre të dy vendeve, gjë që kjo ende nuk ka ndodhur”, është shprehur kryekuvendari.

Ai ka shtuar se këto bisedime do të duhej të zhvilloheshin mes dy vendeve që e njohin njeri-tjetrin, mes dy vendeve që nuk kanë qellim dhe synim të përzihen në punët e brendshme të njeri-tjetrit “dhe nëse i shikojmë zhvillimet që kanë ndodhur jo vetëm pas 25 korrikut, por edhe me herët, kanë treguar dhe po tregojnë që megjithatë Serbia dëshiron të ndërhyjë shumë në punët e brendshme të Kosovës. Kur e mendojmë këtë rrafsh mendojmë që bisedimet vështirë se do të arrijnë objektivin e tyre për të cilin edhe kanë filluar”. /Telegrafi/