Rexhepi: Do t’i kapim kriminelët

Ministri i Punëve të Brendshme (MPB), Bajram Rexhepi, ka thënë se institucionet e Kosovës janë të përkushtuara për të vendosur rend dhe ligj në veri dhe për t’i sjellë para drejtësisë të gjithë kriminelët.

Ai në bisedë për gazetën Epoka e Re ka theksuar se Republika e Kosovës është përcaktuar për sundimin e rendit dhe ligjit dhe së bashku me partnerët ndërkombëtarë u shpreh se janë të vendosur për t’i sjellë të gjithë kriminelët para drejtësisë.

Rexhepi ka deklaruar se institucionet e Republikës së Kosovës kanë edhe plan strategjik për kapjen e kriminelëve, të cilët veprojnë në pjesën veriore të vendit, mirëpo është e përcaktuar që të gjitha veprimet e saj t’i realizojë nëpërmjet rrugëve demokratike.

“Po, ka plan, por duhet të kihet parasysh se Republika e Kosovës është shtet demokratik dhe pretendon t’i zgjedhë problemet në mënyrë demokratike. Jemi të vendosur për ta shtrirë autoritetin gjithnjë e më shumë edhe në veri”, ka theksuar ministri Rexhepi, duke shtuar se do të ketë angazhim të shtuar institucional edhe për bindjen e qytetarëve për t’i përkrahur institucionet e Kosovës.

“Shtrirja e autoritetit nuk është vetëm çështje e arrestimit të kriminelëve, por duhet të shtohet edhe bindja e qytetarëve tanë që jetojnë në atë pjesë për t’i përkrahur dhe respektuar institucionet e Kosovës”, është shprehur ai.

Duke folur për strukturat paralele, ministri i Punëve të Brendshme ka theksuar se shuarjen e strukturave paralele duhet ta bëjë vetë shteti serb, mirëpo sipas tij nëse shteti serb nuk e bën një gjë të tillë, atëherë do të jenë institucionet e vendit që do të merren me këtë çështje. /Telegrafi/