Kuçi: Kriminelët nuk do të flenë qetë

Zëvendëskryeministri i Kosovës, Hajredin Kuçi, ka thënë se institucionet do të vazhdojnë aktivitetet për shtrirjen e rendit e ligjit në gjithë vendin, porse pret që bashkësia ndërkombëtare të ushtrojë më shumë presion mbi Beogradin për të ndalur financimin e strukturave paralele në pjesën veriore.

Dyshi i ekzekutivit të Kosovë ka theksuar se shteti i Kosovës ka kapacitete të mjaftueshme për të vënë para drejtësisë të gjithë ata që janë të lidhur me krimin në pjesën veriore.

Këto komente Kuçi i bëri të martën pas një takimi që ka zhvilluar me përfaqësuesit e Shoqatave të Familjarëve të të Zhdukurve të Kosovës.

“Njerëzit që janë marr me krim të organizuar, që kanë shkelur ligjin mos të flenë të qetë se veprimet tona do të jenë të plota, por në anën tjetër presim që bashkësia ndërkombëtare t’i bëj një presion Beogradit”, ka thënë ai, raporton “Express”.

Sa i përket paralajmërimit të qytetarëve shqiptarë se janë lodhur nga situata e tanishme dhe për këtë shkak do të bllokojnë rrugën, Kuçi tha se ata duhet t’iu besojnë institucioneve të Kosovës.

“Nuk ka nevojë për asnjë lloj vetëgjyqësie apo vetë mbrojtje. Ne jemi mbrojtësit më të mirë të qytetarëve shqiptarë dhe serbë. Të gjithë të tjerët janë duke penguar jetën e lirë të tyre”, është shprehur ai.

Sikurse edhe me par, Kuçi tha se në mbledhjen e sotme të Këshillit të Sigurimit, përfaqësuesit e shtetit të Kosovës do të prezantojë të arriturat në muajt e fundit, por edhe sfidat për vendosjen e rendit dhe ligjit. Ndër të tjera, dyshi i ekzekutivit të Kosovë komentoi edhe përpjekjet e bëra nga Rusia për të nxjerrë në Këshillin e Sigurimit një deklaratë që dënon aktet e Prishtinës në raport me veriun. Ai tha se e drejta është në anën e Kosovës dhe se natyrisht ka perceptime të ndryshme brenda Këshillit të Sigurimit.

“Por të gjithë anëtaret e KS-së e njohin të drejtën që të vendoset rendi dhe ligji dhe që duhet të luftohet kontrabanda dhe krimi i organizuar”. /Telegrafi/