Milionat e parë për gurë vullkanikë, në Malishevë e Leposaviq

Prishtinë, 26 qershor - Dy kompani nga Malisheva kanë fituar tenderin në vlerë prej 1 milion e 300 mijë eurosh për asfaltimin me gurë vullkanikë të magjistrales Prishtinë-Ferizaj, përkatësisht 8 kilometra të segmentit të Çagllavicës.
Biznesmeni Habib Morina, me kompaninë e tij “AHN Group”, i cili ka pranuar se është një mik i ministrit Limaj, ka fituar tenderë milionësh së bashku me konsorciumin “Timi Krsko”, e cila ka për pronar tre biznesmenë nga Malisheva. Njëri prej tyre, Agim Krasniqi, është aksionar edhe në kompaninë e Morinës. Kompania “AHN Group” është krijuar më 29 tetor të vitit 2008 dhe ka pasur të regjistruar vetëm 4 punëtorë e tre aksionarë. Këto dy kompani gurin vullkanik e blejnë nga “Arena Invest”, e cila është krijuar në prill të vitit 2009 dhe ka për aksionarë ish-drejtorin e IPKO-s Akan Ismajlin, Bujar Musën, Fadil Demirin dhe biznesmenin Aleksandar Mihajloviq. Baza e saj është në qytetin e Leposaviqit, në veri të Kosovës.
Biznesmeni Akan Ismaili, i cili është aksionar i “Arena Invest”, ka theksuar se nuk mund të përgjigjet për detajet e kontratave me kompani të ndryshme të lidhura për shitjen e gurëve vullkanikë.
“Ne jemi vetëm investitorë aty. Si unë, ashtu edhe Fadil Demiri. Drejori i kompanisë Artan Lahaj, që është i autorizuar për të folur është në pushim”, ka thënë Ismaili për gazetën Koha Ditore përmes telefonit. Për më shumë, lexoni në numrin e sotëm të gazetës.