Filluan takimet bilaterale në samitin e Prizrenit

Prievallë, 26 qershor- Me ftesë të presidentit të Kosovës, Fatmir Sejdiu, në Prevallë të Prizrenit ka filluar punimet samiti i tretë rajonal, ku pos nikoqirit, marrin pjesë edhe presidenti i Shqipërisë, Bamir Topi, ai i Maqedonisë Gjorgje Ivanov dhe presidenti i Malit të Zi, Filip Vujanoviq.

Ky samit është vlerësuar se do të shtyjë përpara procesin e bashkëpunimit në rajon, si dhe do të promovojë paqen dhe stabilitetin e kësaj pjese të Evropës.

Ndërkaq, thirrja e këtij samiti nga presidenti Fatmir Sejdiu, nga politika kosovare dhe analistët është cilësuar si mesazh i Kosovës, përmes së cilit shprehet gatishmëria për bashkëpunim me të gjithë fqinjët.

Kosova, si shteti më i ri në rajon dhe Evropë, ka vendosur tashmë marrëdhënie diplomatike në nivel ambasadash me Shqipërinë dhe Maqedoninë. Ndërkaq, me Malin e Zi ende nuk është vendosur një nivel i tillë i marrëdhënieve.

Sidoqoftë, pas njohjes së komunitetit malazez si pakicë në Kosovë, vendosja e marrëdhënieve në nivel ambasadash me Podgoricën shihet vetëm si çështje kohe.

Presidentët e katër shteteve ballkanike janë takuar veç e veç duke i kushtuar njëri-tjetrit nga 20 minuta kohë për të diskutuar, ashtu siç është paraparë në agjendën dyditore të këtij samiti. Gjate pauzës, presidentit Bamir Topi i është dhënë një mirënjohje nga shoqata “Miqtë e Amerikës” për kontributin e dhënë në çështjen nacionale dhe angazhimit të tij në mbështetjen e Kosovës.

Presidentet pritet të zbresin nga Prevalla në Prizren për të drekuar në ambientet e restorant Krajku, për tu rikthyer në fshatin turistik në Prevallë, në takimin e përbashkët
dhe më pas në një konferencë për gazetarë.