Cooper nuk deklarohet për takimet në Prishtinë

Përfaqësuesi i baroneshës Catherine Ashton në bisedimet Kosovë -
Serbi, Robert Cooper, ka qëndruar sot në Prishtinë, me ç’rast është
pritur nga kryeministri Hashim Thaçi dhe zëvendëskryeministrja Edita
Tahiri.Cooper, pas takimit është larguar pa dhënë ndonjë deklaratë.

Një ditë më herët, ndërmjetësuesi evropian qëndroi në Beograd, ku ka
diskutuar për temat e radhës që do të bisedohen në dialogun
Kosovë-Serbi.

Zëvendëskryeministri Hajredin Kuçi tha se krerët e Qeverisë së
Kosovës zhvilluan një takim konsultativ me Robert Cooperin, para
vazhdimit të bisedimeve me Serbinë, në fillim të shtatorit.

“Është një takim konsultativ që sot ka zhvilluar me përfaqësuesit e
institucioneve të Kosovës. Është një takim parapërgatitor do të thosha,
për dialogun që do të zhvillohet më 2 shtator. Natyrisht që aty do të
shprehen qëndrimet e Kosovës dhe me siguri që do të ketë harmonizim të
qëndrimeve edhe me përfaqësuesin e BE-së”, deklaroi Kuçi.

Këto komente, zëvendëskryeministri Hajredin Kuçi i bëri pas një
takimi që zhvilloi me përfaqësuesit e shoqatave të familjarëve të
personave të pagjetur të luftës, që u mbajt në kuadër të aktiviteteve
për shënimin e 30 Gushtit – Ditës Ndërkombëtare të të Zhdukurve.

Fati i këtyre personave pritet të jetë një nga temat e radhës në bisedimet Kosovë – Serbi. /Rel/Telegrafi/