Robert Cooper të martën në Prishtinë

Ndërmjetësuesi i Bashkimit Evropian në bisedimet Kosovë-Serbi, Robert Cooper, të martën do të vizitojë Kosovën. Mësohet se Cooper do të takojë shefen e delegacionit kosovar në bisedime, Edita Tahiri, dhe zyrtarë të tjerë të vendit.

Cooper të hënën ka qëndruar në Beograd, ku ka zhvilluar bisedime me kryenegociatorin serb, Borislav Stefanovic, raporton REL.

Pas takimit me diplomatin evropian, Stefanovic ka thënë se çështja e funksionimit të institucioneve serbe në veri të Kosovës nuk do të jetë temë e raundit të ardhshëm të bisedimeve, që pritet të zhvillohet më 2 shtator. /Telegrafi/