Mlladiq nuk deklarohet për akuzat

Në paraqitjen e tij të parë në Gjykatën e Hagës për Krime Lufte, i
akuzuari Ratko Mlladiq tha se është “njeri shumë i sëmurë”, njofton REL.

Ai refuzoi të deklarohet lidhur me “akuzat e papranueshme”, akuzat
për gjenocid, për krime të luftës dhe krime kundër njerëzimit.
“Unë
nuk e mbroj këtu Mlladiqin, gjeneralin Mlladiq, por mbroj popullin tim,
shtetin tim”, u përgjigj Mlladiqi, ndërsa kryesuesi i sqaroi se ai
akuzohej dhe jop shteti, as populli i tij.

Gjyqtari kryesues, Alfons Ori, e caktoi datën e re për deklarim për fajësinë më 4 korrik.

I pyetur nga gjyqtari Ori se a i kupton të drejtat e tij si i
akuzuar i Tribunalit të Hagës për krime të luftës në ish-Jugosllavi,
Ratko Mlladiq tha se është njeri shumë i sëmurë dhe se i duhet më tepër
kohë për t’i kuptuar akuzat.

“Nuk dëshiroj të më lexohet aktakuza në asnjë fjalë dhe në asnjë fjali”, tha Ratko Mlladiq.
I
pyetur nëse kishte ndonjë ankesë në trajtim, ai tha se sjelljet ndaj
tij janë korrekte, porse nuk ndjehet mirë që e mbajnë policët për
krahësh.