Akuzat e Krasniqit janë të karakterit elektoral

Kryeministri në largim, Hashim Thaçi, e ka quajtur akuzë qesharake, tendencioze dhe të karakterit elektoral padinë e ngritur nga ana e Florin Krasniqit ndaj tij.
“Dua të them se janë akuza qesharake, tendencioze të karakterit elektoral. Do të duhej ata njerëz t’i kërkonin ndjesë qytetarëve për tentimin e tyre për të inkriminuar fushatën elektorale. Unë do të vazhdoj të prezantoj popullin dhe vizionin tim për të ardhmen 4-vjeçare të shtetit të Kosovës për ta integruar në NATO dhe Bashkimin Evropian”, është shprehur Thaçi në Rahovec, ku të dielën mbahen zgjedhjet për kryetar të Komunës.

Florin Krasniqi nga Lëvizja Vetëvendosje! ka deponuar të mërkurën në Gjykatën Komunale të Prishtinës një padi kundër kryetarit të Partisë Demokratike të Kosovës, Hashim Thaçi, për siç tha, akuzat që Thaçi ka bërë kundër tij dhe familjes së tij. Krasniqi i referohet një komunikate të lëshuar nga Partia Demokratike Kosovës më 5 nëntor, të cilën e quan “shpifje”, njoftojnë mediat në Prishtinë.