Paratë e drogës për viktimat

Në Ditën Ndërkombëtare të Luftës kundër Drogës, ministri i Brendshëm i Shqipërisë, Lulzim Basha, ka deklaruar se pronat dhe llogarite qe do t’u sekuestrohen trafikantëve të drogës do t’u jepen familjeve të personave që kanë rënë viktima të përdorimit të drogës.
Basha u shpreh se strategjia e re e luftës kundër drogës parashikon përfshirjen të gjitha institucioneve.

“Me Agjencinë e Administrimit të Pasurive do të bashkëpunojmë që me pasuritë që iu marrim këtyre tregtarëve të vdekjes, t’i vëmë ato në shërbim të rehabilitimit të këtyre viktimave”, u shpreh Basha.

Ndërsa ministri i Shëndetësisë e ka parë në një aspekt moral luftën kundër drogës. Ai ka deklaruar se Ministria e Shëndetësisë është pranë të gjitha familjeve që kanë mes tyre një përdorues droge, për t’i ndihmuar jo vetëm nga ana shëndetësore por edhe morale.

“Ne mbështesim çdo familje shqiptare e cila përballet me këtë fenomen. Shumë familje shqiptare, marrin mesazhe të qarta për mbështetjen që jepet”, u shpreh ministri Petrit Vasili.

Slogani i këtij viti i caktuar nga Organizata e Kombeve të Bashkuara është, “mendo për shëndet - jo drogës”.

Në Shqipëri mendohet të ketë rreth 30 mijë përdorues, nga të cilët 10 mijë prej tyre janë përdorues heroine, që konsiderohet si droga më e fortë dhe varësia ndaj të cilës është edhe më e madhe. /TCH/