Ndërpritet një kanal i kontrabandimit të drogës nga Kosova

Policia e Çekisë ka arritur të ndërpresë një kanal të kontrabandimit të heroinës nga Kosova drejt Skandinavisë, kur në muajin maj kishte arrestuar një shqiptar, një polak dhe një çek, të cilët kishin organizuar transportin e rreth 10 kg të këtij lloji të drogës drejt Suedisë, ka bërë të ditur të hënën Qendra Nacionale çeke për luftë kundër narkotikëve.

Në aksionin e titulluar “Pec”, detektivët çekë dhe ata suedezë kishin përcjell këtë grup për disa muaj me radhë, pasi policia suedeze kishte siguruar informata për kontrabandimin e kësaj sasie nëpërmjet një korrieri, i cili ishte arrestuar në Malmo.

Organizator kryesor i këtij kontrabandimi, sipas policisë çeke, ishte një person mashkull, shqiptar, i cili nuk ishte emër i panjohur në fushën e këtij biznesi ilegal – pasi që, sipas informatave që disponon policia çeke, në të kaluarën ai kishte organizuar transportin e drogës nga Kosova drejt Evropës Perëndimore, para se gjithash drejt Italisë, Zvicrës dhe Spanjës.

Edhe kolegu i tij polak, sipas policisë çeke, ka qenë i dënuar disa herë për këtë punë në Itali, ndërsa çeku i arrestuar kishte shërbyer si korrier, i cili është dashur të siguronte kalimin e kësaj droge drejt vendeve skandinave.

Tre të arrestuarit tashmë ndodhen në burg, dhe rrezikojnë të dënohen nga 100 deri në 15 vjet burg.