AKR:Mosbesim shkaku i krizës, jo i keqqeverisjes

AKR:Mosbesim shkaku i krizës, jo i keqqeverisjes

Deputetët e Partisë Demokratike të Kosovës nuk do ta kenë problem që ta mbështesin mocionin e mosbesimit të Qeverisë, pasi në të nuk figuron askund keqqeverisja, por vetëm “fajësia” e LDK-së për shkaktim të krizës institucionale. Në rast se një mocion i tillë, i formuluar nga AKR-ja kalon më 28 tetor, atëherë data më e largët për zgjedhje të parakohshme do të jetë 12 dhjetori.
E përditshmja Koha Ditore ka siguruar mocionin e mosbesimit të Qeverisë, të përpiluar nga Grupi parlamentar i AKR-së, në të cilin si arsyetim për largimin e Qeverisë aktuale merret vetëm rreziku që vendi mund të përfundojë në krizë të përgjithshme institucionale, pas veprimeve të LDK-së.

“Kriza institucionale, e shkaktuar pas vendimit të Gjykatës Kushtetuese të Republikës së Kosovës, ku ka konstatuar shkelje serioze të Kushtetutës të Republikës së Kosovës nga ana e presidentit, që ka rezultuar me dorëheqjen e presidentit të Kosovës dhe pas tërheqjes së Lidhjes Demokratike të Kosovës nga koalicioni qeveritar, rrezikon të derivojë me krizë të përgjithshme institucionale në vend”, thuhet në arsyetimin e mocionit.

Nënkryetari i AKR-së, Ibrahim Makolli e arsyeton këtë formulim me degjenerimin e vazhdueshëm të Qeverisë që është duke ndodhur, pikërisht si rrjedhojë e vendimeve të specifikuara në mocion.

“Ne nuk e kontestojmë faktin që kjo qeveri ka degraduar qysh nga fillimi, megjithatë jemi mbështetur në thellimin e krizës së shkaktuar së fundmi”, ka theksuar Makolli. Ai nuk ka pranuar që mungesa e një paragrafi në mocion ku do të specifikohej keqqeverisja të jetë bërë me qëllim që deputetët e PDK-së ta kenë më të lehtë mbështetjen e tij.

Vetëm gjatë të premtes, ai ka thënë se mocioni është mbështetur nga 20 deputetë, prej të cilëve, sipas tij, asnjë nuk është i PDK-së. Makolli ka shprehur besimin se mocioni do të jetë gati me 40 nënshkrime, qysh të hënën e javës së ardhshme, mirëpo nuk ka qenë i sigurt se kur do të trajtohet nga Kryesia e Kuvendit.

Me rregulloren e punës së Kuvendit, parashihet që mocioni i mosbesimit për Qeverinë të vihet në rend dite jo më vonë se pesë ditë e jo më herët se dy ditë nga parashtrimi i tij në Kuvend. Nëse mocioni arrin të futet në votim dhe të miratohet në seancën plenare që do të mbahet javën e ardhshme, atëherë ushtruesi i detyrës së presidentit, Jakup Krasniqi do to të ketë mundësi që po atë ditë ta shpërbëjë Kuvendin dhe brenda dhjetë ditësh ta shpallë datën e zgjedhjeve të parakohshme.