Serbia të pranojë realitetin, ose do të pësojë serish

Kryetarja e Komitetit serb të Helsinkit, Sonja Biserko, i ka bërë thirrje autoriteteve të Beogradit që të nisin një dialog “aktiv dhe të sinqertë” me Kosovën si shtet sovran dhe i pavarur. Ajo ka thënë se ka ardhur koha që Serbia ta pranojë realitetin e ri në rajon, në të kundërtën do të pësojë serish.
“Serbia ka humbur besueshmërinë sepse nuk ka marrë pjesë aktivisht dhe do të humbasë edhe në të ardhmen nëse nuk e pranon në mënyrë të sinqertë këtë dialog”, tha Biserko në një intervistë për BBC-në. Ajo parashikon që përpjekjet për ta lidhur dialogun me statusin e Kosovës, do të jenë të pasuksesshme dhe i kërkoi bashkësisë ndërkombëtare që të ushtrojë më shumë presion mbi Beogradin.

Aktivistja e njohur për të drejtat e njeriut, mendon se autoritetet serbe duan që të përfitojnë nga dialogu me Prishtinën. “Beogradi, në mënyrë shumë dinake ka kushtëzuar me frustrimin për humbjen e Kosovës, me kërkimin e kompensimit në Bosnjë”, tha ajo dhe shtoi se në të dy rastet, “askush nuk ka humbur asgjë”.

Biserko tha se mungesa e dialogut mes Prishtinës dhe Beogradit, godet më shumë serbët në Kosovë. “Ata kanë pritur shumë gjatë mbështetjen e Beogradit..., por ajo gjithmonë ka munguar sepse politika e Serbisë është përqendruar në veriun e Kosovës me idenë që ta izolojë nga Kosova”.

Kryetarja e Komitetit serb të Helsinkit tha se është koha që të prishen institucionet paralele dhe strukturat e Beogradit në veri të Kosovës në dobi të serbëve të thjeshtë. "Ata janë një lloj pengu i një grupi të vogël njerëzish që shikojnë interesat e tyre personale dhe që punojnë për interesat e shtetit që e ka humbur këtë betejë”.