Jahjaga sërish e lë në shtëpi Tadicin

Presidenti i Serbisë, Boris Tadic, nuk do të merr pjesë më 2
qershor në Romë në festimin e 150 vjetorit të bashkimit të Italisë, pasi
që nikoqirët, siç ka deklaruar Tadic për agjencinë e lajmeve ANSA, në
atë ngjarje kanë ftuar edhe presidenten e Republikës së Kosovës, Atifete
Jahjaga.Në të njëjtën kohë, Tadic ka deklaruar se vendimi i
tij nuk do të ndikojë në mbajtjen e samitit italiano-serb në Beograd në
fund të qershorit, transmeton Zëri.
“Jam thellësisht i dëshpëruar pasi që nuk do të jem në gjendje të
marr pjesë më 2 qershor në kremtimin e 150 vjetorit të bashkimit të
Italisë, pasi që në atë ngjarje është e ftuar edhe presidentja e të
ashtuquajturit shtet të Kosovës”, ka thënë Tadic.
“Unë duhet dhe dua t’i mbroj interesat legjitime të Serbisë, dhe siç
duket, institucionet italiane i kanë dhënë përparësi pjesëmarrjes së
përfaqësueses së Kosovës në këtë ngjarje”, ka shtuar Tadic.
Presidenti serb, Boris Tadic, nuk ishte i pranishëm as gjatë samitit
të 17-të të presidentëve të vendeve të Evropës Qendrore, që u mbajt në
Varshavë të Polonisë më 27 dhe 28 maj, për të njëjtën arsye, se në samit
ishte e ftuar edhe presidentja e Kosovës, Atifete Jahjaga. /Telegrafi/