Burns: Serbia të pajtohet me realitetin

Nënsekretari amerikan për çështje politike, William Burns, ka deklaruar të premten pasdite në Dubrovnik se Serbia “duhet të pajtohet me realitetin Kosovë”.

Burns, duke folur në Samitin e 6-të me radhë të mbajtur në Kroaci, temë e së cilit është perspektiva dhe zgjerimi i rajonit në BE, ka përshëndetur “hapat mbresëlënës” të cilët Serbia, e udhëhequr nga presidenti Tadic, po i ndërmerr drejt Evropës.

“SHBA përshëndet dialogun e lehtësuar nga BE në mes të Prishtinës dhe Beogradit, sikurse edhe marrëveshjet e arritura”, citon Zëri nënsekretarin amerikan për çështje politike, duke shtuar se problemi në veri të Kosovës nuk guxon të kthehet në “konflikt të ngrirë”.

Në Samit ishin të ftuar edhe përfaqësuesit e shtetit serb dhe të atij boshnjak, mirëpo asnjëri prej tyre nuk u paraqitën në këtë konferencë dy-ditore.

Serbia, mos-pjesëmarrjen e saj e arsyetoi, sikurse edhe vitin e kaluar, me pjesëmarrjen e kryeministrit të Kosovës, Hashim Thaçi. /Telegrafi/