Konuzin: Serbia po shantazhohet!?

Ambasadori rus në Beograd, Aleksandar Konuzin, ka thënë se për shkak të dëshirë së saj të madhe për të qenë anëtare e BE-së, Serbinë po e shantazhojnë me Kosovën.

Konuzin u ka thënë gazetarëve serbë se Serbinë po e detyrojnë të heq dorën nga “interesat e saj nacionale në Kosovë”.

“Bashkësia ndërkombëtare haptas po e shkel Rezolutën 1244 të KS të OKB-së”, ka thënë ai, transmeton “Beta”.

Ai ka theksuar se EULEX ka ardhur në Kosovën në vitin 2008, në përputhje me atë Rezolutë, si një mision neutral.

“Ndërsa tash haptas është në anën e Prishtinës dhe ndihmon shqiptarët e Kosovës që vendimet e tyre të zbatohen në vepra”, ka thënë Konuzin. “EULEX në mënyrë agresive kështu po e shkel të drejtën ndërkombëtare duke aplikuar standarde të dyfishta”. /Telegrafi/