Dialogu Beograd-Prishtinë pa ndërmjetës

Luksemburg, 28 tetor – Ministri i Punëve të Jashtme i Luksemburgut, Jean Asselborn, vlerëson se Beogradi e Prishtina duhet të krijojnë mundësinë që të bisedojnë pa ndërmjetës, kurse Bashkimi Evropian të jetë i pranishëm sa për të lehtësuar dialogun.

Asselborn, në një intervistë për të përditshmen e Beogradit “Veçernje Novosti”, ka thënë se Serbia duhet të dëshmojë se është “e zonja e fatit të vet”, se është e aftë të përmbushë kushtet e parashtruara, të zbatoj reformat e domosdoshme dhe të gjejë zgjidhjen bashkë me Kosovën.

Asselborn ka thënë se njohja e pavarësisë së Kosovës nuk është kusht për Serbinë që ajo të bëhet anëtare e BE-së, por është e logjikshme që të gjendet zgjidhja. “Kam parë një hulumtim të opinionit publik në Serbi. Problemi më i madh për qytetarët është papunësia, kurse një nga ato të fundit në këtë listë është Kosova”, ka vlerësuar Asselborn.

Sipas fjalëve të tij, me procedimin e kandidaturës në Komisionin Evropian, Serbia dhe BE kanë hyrë në një fazë të re marrëdhëniesh.

“Nëse deri në vitin 2020 ja dalim t’i integrojmë të gjitha vendet e Ballkanit në BE, mund të themi se kemi punuar mirë”, ka thënë Asselborn.