Radikalët pushtojnë me armë Kuvendin në Mitrovicë

Mitrovicë, 2 nëntor – Është pushtuar me forcë nga radikalët serbë objekti i komunës në veri të Mitrovicës, ku ushtronte veprimtarinë administrata, një koalicion po ashtu i pushtetit në Beograd. Radikalët e SNS të Tomisllav Nikoliqit dhe përfaqësuesit e DSS-së të Voisllavë Koshtunicës, kanë marrë me dhunë objektet e komunës. Në përkrahje të radikalëve ka dalë edhe Këshilli Nacional Serb me në kryer Millan Ivanoviqin. Në këtë mënyrë ata kanë dëbuar nga zyrat përfaqësuesit e koalicionit në fuqi, të tubuar rreth DS, parti e Boris Tadiqit.
Për zhbllokimin e situatës në këtë komunë paralele, tani më tepër të acaruar përfaqësuesit e koalicionit në fuqi kanë kërkuar ndihmë edhe nga Qeveria e Beogradit në zhbllokimin e situatës. Burime të Koha.net nga veriu i Mitrovicës, lidhur me këtë ndërhyrje të partive opozitare radikale serbe në këtë komunë, theksojë se radikalët e Nikoliqit dhe “demokratët” e Koshtunicës kanë hyrë të armatosur në objekt, duke kërcënuar me vdekje punëtorët e administratës dhe kryetarin e Komunës dhe të Kuvendit. Në një komunikatë të lëshuar për media të martën, thuhet se koalicioni DS, G17 plus, SPS-PUPS-JS, Iniciativa qytetare ‘Serbia, Demokracia, Drejtësia’ e Oliver Ivanoviqit dhe SDPS e Rasim Laiqit reagojnë në lidhje me hyrjen e dhunshme të përfaqësuesve të SNS dhe DSS në objektin e të ashtuquajturës komunë paralele në veri të Mitrovicës, duke penguar në punën e organeve, për këta, legjitime të komunës. Në komunikatën e lëshuar thuhet se “përfaqësuesit legjitimë të komunës janë zgjedhur në votimet komunale të mbajtura më 26 korrik 2010. I vetmi organ legjitim dhe legal i Komunës së Mitrovicës është kryetari i Komunës Ivica Mirkoviq dhe kryetar i Kuvendit, Ksenija Bozhoviq si dhe persona të tjerë të zgjedhuar”, siç thuhet në komunikatë. “Pengimi në kryerjen e detyrave nga ana e përfaqësuesit të SNS-së dhe të DSS-së të Nikoliqit, përkatësisht Koshtunicës, është pengim në realizimin e projekteve në të mirë të qytetarëve, si asfaltimin e rrugëve, pengimin në ndërtimin e ndërtesës së ‘Sindikatës’, pengim në zgjidhjen e problemeve në rrjetin e ujësjellësit dhe me këtë kanë sjellë në pyetje edhe dhënien e pagave për punëtorët e komunës dhe të organizatave të tjera komunale thonë ish-zyrtarët e pushtetit paralel të Beogradit në Mitrovicë, që tani më gjenden të dëbuar në rrugë.
Përfaqësuesit e të ashtuquajturës komunë të Mitrovicës kërkojnë nga organet kompetente të Serbisë që urgjentisht të ndërhyjnë me qëllim të zhbllokimit të komunës dhe të fillimit të punës. Situata e ndjeshme politike në këtë qytet në këtë mënyrë është përkeqësuar
më tej, thuhet në këtë komunikatë.
Në anën tjetër përfaqësuesit e Këshillit Nacional Serb (KNS) të veriut të Kosovës kanë thënë se situata e përgjithshme në Kosovë është duke u përkeqësuar në mënyrë rapide. Përkeqësimin e situatës e ka përshkruar të martën, në takimin me gazetarë në veri të Mitrovicës, Millan Ivanoviq, kryetar i KNS-së, dhe ka shtuar se regjimi i Beogradit është duke i ndihmuar në mënyrë direkte mentorët e pavarësisë së shqiptarëve. Ai ka akuzuar drejtpërdrejt përfaqësuesin e këshillit për politikë të jashtme të Partisë Demokratike, Dragolub Miqunoviq, se me deklaratat e tij është duke tentuar të tërheqë serbët në
institucionet e Kosovës së pavarur përmes zgjedhjeve.
Duke folur për pushtetin lokal në veri të Mitrovicës, ai potencoi se vullneti i qytetarëve, i shprehur në zgjedhjet e majit, duhet të respektohet. Ndërsa Ivanoviq kërkon që qeverisja komunale në veri të Mitrovicës të formohet nga SNS-ja dhe DSS-ja, të cilët kanë marrë vota më shumë, por jo edhe për të formuar qeverisjen komunale në veri të Mitrovicës.