Gecët dënohen me një mijë euro për “kuvendin e karrigeve”

Grushtet e karriget në Kuvendin e VI-të të LDK-së, familjes Geci i ka kushtuar “më së shumti”. Një mijë euro gjobë i kanë paguar Gani Geci, Arbër Geci, Esat Geci e Arton Geci për incidentin në Kuvendin e VI-të të LDK-së që tashmë ka fituar epitetin si “kuvendi i karrigeve”.
Aktgjykimi i Gjykatës Komunale të Prishtinës, vëllezërve Geci u ka shkuar me postë në Llaushë të Skenderajt në janar, disa javë pas shpalljes së aktgjykimit për vepër penale të lëndimit të lehtë truporë.

Siç shkruan Koha Ditore, Gjyqtari i Gjykatës Komunale të Prishtinës, Nexhmedin Sejdiu, e ka shpallur aktgjykimin më 24 dhjetor të vit të kaluar bazuar në një urdhër ndëshkimor të Prokurorisë Komunale të Prishtinës.

Njëri nga njerëzit që “hija e incidentit” e kishte shoqëruar për gjashtë vjet, Gani Geci, nuk e ka të qartë se si ka mundur të shpallet ky aktgjykim nga Gjykata Komunale, kur dihet fakti se ka qenë një proces duke u zhvilluar në një gjykatë tjetër – atë të Qarkut të Prishtinës. /Telegrafi/