Bisedimet pas zgjedhjeve

Ushtruesi i detyrës së presidentit, Jakup Krasniqi tha të mërkurën se Kosova është e gatshme të hyjë në bisedime me Serbinë, por vetëm pas zgjedhjeve dhe krijimit të institucioneve të reja.
Krasniqi këto komente i bëri pas takimit me eurodeputeten Doris Pack.

“Ne jemi për bisedime dhe sigurisht që zgjedhjet e jashtëzakonshme kërkojnë konstituimin e institucioneve të Kosovës dhe fillimin e bisedimeve. Mendoj se në këtë rrafsh, jemi në një mënyrë dakord të plotë se institucionet e Kosovës të dala nga zgjedhjet duhet ta marrin përgjegjësin për bisedime”, ka thënë Krasniqi.